Á fjölmennu Íslandsmóti barna f. 2001 og yngri vann Nansý Davíðsdóttir 4-EHE í Rimaskóla sögulegan sigur þegar að hún varð fyrst íslenskra stúlkna og kvenna til að sigra í opnum flokki á skákmóti. Íslandsmótið var æsispennandi en tefldar voru 9 umferðir. Nansý sýndi mikið öryggi þegar kom að síðustu umferðunum og tapaði ekki skák á mótinu. Fyrir síðustu umferðina var nokkuð ljóst að Nansý ætti sigurinn vísan, komin í efsta sæti og búin að tefla við alla sína helstu andstæðinga. Nansý endaði með 8,5 vinninga af 9 mögulegum, frábær árangur miðað við hversu fjölmennt og sterkt skákmótið var. Nansý hefur verið ótrúlega sigursæl á skákmótum þrátt fyrir ungan aldur og er meðal annars Íslandsmeistari stúlkna og Norðurlandameistari með skáksveit Rimaskóla. (HÁ)

Ólafur Ragnar Grímsson, forseti Íslands kom í heimsókn í Rimaskóla í fyrsta sinn þegar hann var viðstaddur setningu Íslandsmóts barna 2012 en þar var hann heiðursgestur. Forsetinn gaf sér góðan tíma í skólanum og staldraði við í tæpa tvo klukkutíma. Auk forsetans var Össur Skarphéðinsson utanríkisráðherra viðstaddur setningu Íslandsmótsins og áttu þeir spjall við skólastjóra um skólastarfið í Rimaskóla, glæsilega skólabyyggingu og ekki síst það mikla skákstarf sem skólinn hefur sinnt frá upphafi. Utnaríkisráðherra orðaði það með þeim hætti að í Rimaskóla hefði grettistaki verið lyft í uppbyggingu skaklistar meðal barna-og unglinga. Forsetinn gaf sig á tal við skákkrakkana og leyfði foreldrum að smella mynd af börnum sínum við hlið forsetans. (HÁ)

Nemendur Rimaskóla sýndu hæfileika sýna svo um munaði á tveimur fjölmennum jólaskemmtunum í hátíðarsal Rimaskóla. Krakkarnir í 4. bekk sýndu helgileikinn, léku þar og sungu eins og englar. Jólaleikrit ársins var "Grýla gamla og jólasveinarnir" sem nemendur 6. bekkjar fluttu undir leikstjórn Eggerts Kaaber. Frábær frammistaða leikara, kórsins og tæknimanna sem hafa lært leikræna tjáningu hjá Eggert á annað ár. Snorri Heimisson tónlistarkennari lék undir jólalög með þremur nemendum sínum sem léku á fagott og þverflautu. Dansararnir efnilegu í 5. bekk sýndu tja, tja jóladansinn og að lokum var gengið í kringum jólatréð í íþróttasalnum undir stjórn Huldu danskennara og Rakelar Maríu tónmenntakennara. Glæsileg jólaskemmtun sem kom öllum nemendum og starfsmönnum skólans í reglulega gott jólaskap. (HÁ)

Nemendur Írisar í 5-GÍA vönduðu sig virkilega þegar þau fluttu "Brot af því besta", en það nefndu þau skemmtidagskrá sína á föstudagsfjöri. Að vanda komu allir krakkarnir fram og sýndu hæfileika sína í söng, dansi og spili. Á milli atriða var boðið upp á látbragðsleik og góða brandara. Jólaandinn sveif yfir vötnum og öll voru þau í 5-GÍA með jólasveinahúfur. Bekkurinn endaði á glæsilegum bekkjarsöng við undirleik Rakelar Maríu tónmenntakennara. Þaö voru hin hugljúfu lög Stingum af með Mugison og Jólin allsstaðar, tvö hreinræktuð íslensk lög. Föstudagsfjör Rimaskóla eru að sanna sig sem hin mesta fjölskylduskemmtun. Gestasætin voru öll setin og fjölmargir foreldrar, systkini og aðrir ættingjar urðu að standa, svo mikill var fjöldinn. (HÁ)