Oliver Aron Jóhannesson 5-C varð efstur ásamt tveimur öðrum á 100 mann Íslandsmóti barna í skák. Í úrslitaeinvígi um titilinn Íslandsmeistari barna varð Oliver síðan í 2. sæti. Með þessum frábæra árangri vann hann sér inn sæti á Norðurlandamótið í skólaskák sem fram fer í Færeyjum 12. - 15. febrúar. Hjörvar Steinn Grétarsson 10-R mun einnig tefla á Norðurlandamótinu enda margfaldur Norðurlandameistari í gegnum árin.(HÁ)

Börnin í Rimaskóla horfðu hugfangin á helgileik nemenda í 4. bekk og skemmtu sér vel yfir jólaleikritinu Grýla og jólasveinarnir sem nemendur 6. bekkjar léku undir leikstjórn Margrétar og Eggerts Kaaber. Nemendur léku á hljóðfæri og efnilegar söngkonur sungu jólalög. Að lokum var gengið í kringum jólatréð og söngur barnanna ómaði við undirleik Rakelar Maríu tónmenntakennara. Mikið var lagt í jólaskemmtunina að vanda og allir nemendur og starfsmenn skólans fóru í jólaskapi inn í fríið. (HÁ)

Miðstigsráðið ákvað að halda góðgerðarball til styrktar Rauða  Krossinum. Ballið var haldið miðvikudaginn 17. desember og við náðum að safna 6850 kr. og fullt af dóti. Ballið heppnaðist vel og í morgun, 19. desember, fórum við með það sem við söfnuðum í Rauða krossinn, þar var tekið vel á móti okkur og við fengum kex og svala . Ferðin var skemmtileg og þegar henni lauk var komið að jólaballi í skólanum.

Friðrik Erlingsson rithöfundur heimsótti Rimaskóla og las fyrir nemendur 6. og 7. bekkja úr nýútkominni bók sinni Þór í heljargreipum. Friðrik las heilu kaflana úr bókinni. Guðirnir fornu skv. Snorra Eddu urðu ljóslifandi í frábærum upplestri höfundar. (HÁ)

Nemendur 1. - 6. bekkjar Rimaskóla heimsóttu Grafarvogskirkju á aðventu og áttu þar saman jólastund. Sr Guðrún prestur kirkjunnar og Gunnar æskulýðsleiðtogi tóku á móti krökkunum og minntu á helgi jólanna. Mikil tónlist var á dagskrá að hálfu nemenda. Fiðluspil söngur og samsöngur jólalaga undir stjórn Wilmu Young og Rakelar Maríu. Kennarar og stuðningsfulltrúar sáu til þess að börnin voru undantekningarlaust til fyrirmyndar og nutu jólastundarinnar í kirkjunni. (HÁ)

Krakkarnir í stofu 61 hafa verið mjög duglegir við að læra stærðfræði með aðstoð Numicon.  Numicon er hannað til að hjálpa börnum að skilja tölur og stærðir.

Fyrir framan troðfullum sal af nemendum, foreldrum, leikskólabörnum og starfsmönnum stálu krakkarnir í 1-B og 1-C senunni þegar þau heilluðu alla með jólasöng og jólagleði. Einstakir listamenn í hópnum breikuðu, fóru í splitt eða tóku swing eins og ekkert væri sjálfsagðara. Undirspilið var í öruggum höndum Guðbjargar Leifsdóttur og kennararnir Anna Kristín og Karen stjórnuðu ferðinni. Heiðursgestir á fjörinu vor elstu krakkarnir á Lyngheimum. ( HÁ)

Nemendum unglingadeildar var boðið upp á flotta menningardagskrá í lok skóladags. Danshópurinn Dorí, Dorí, Dance Companý sýndi unglingunum nútímalegan dans. Þar fór fyrir danshópnum Inga Maren Rúnarsdóttir fyrrum nemandi skólans og þátttakandi í Skrekk. Ingibjörg Reynisdóttir leikkona og rithöfundur kom í kjölfarið og las upp úr spennandi unglingabók sem hún sendir frá sér fyrir jólin og nefnist Rótleysi, Rokk og Rómantík. Í lokin kynnti Freyr kennari þá nemendur sem komu best út úr forkeppni Nema hvað, spurningakeppni grunnskóla. Var væntnlegu spurningaliði vel fagnað en það skipa Sigvaldi í 10 S, Hjördís 9 R og Ingi 8-R. (HÁ)

Miðvikudaginn 10.desember fóru 7.A og 7.C saman á Café París.Við tókum sexuna þangað og var boðiðuppá heitt kakó og súkkulaðikökumeð rjóma.Svo gengum við upp Laugaveginn, stoppuðum hjáEcco búðinni og fengumokkur brjóstsykur.Svo fórum við á Hlemm og tókum strætó upp í skóla.Þetta varrosalega skemmtileg ferð. (Höfundar fréttar: Helga Hjördís 7.A, Ástrós Eir 7. A og  Katrín Fjóla 7.C)

Skáksveitir Rimaskóla unnu með yfirburðum í eldri og yngri flokk á Jólaskákmóti grunnskóla. Skólinn endurtók leikinn frá því í fyrra. Í móti 8. - 10. bekkjar hlaut Rimaskóli 20, 5 vinninga af 24 mögulegum. Í flokki 1. - 7. bekkjar voru yfirburðirnir ennþá meiri því A sveit Rimaskóla hlaut þar 22,5 vinninga af 24 mögulegum. B- sveit Rimaskóla komst á verðlaunapall og fékk 3. sætið og stúlknasveitin hlaut silfrið í flokki stúlknasveita. Til hamingju með frábæran árangur krakkar.(HÁ)

Krakkarnir í 1 - A stóðu sig frábærlega á föstudagsfjöri og skemmtu skólafélögum, leikskólakrökkum og foreldrum sínum með kröftugum söng og dansi. Hópurinn kynnti sig sem náttfatakórinn og urðu kynnarnir að byrja á því að vekja "kórfélaga". Það var auðséð að krakkarnir höfðu æft atriðin sín mjög vel undir stjórn Ingu Óskarsdóttur kennara og Guðbjargar Leifsdóttur tónlistarkennara. (HÁ)

Skreytingadegi Rimaskóla er lokið með frábærri uppskeru. Nemendur í 1. - 7. útbjuggu margvíslegt og fjölbreytt jólaskraut sem hengt var í loft og upp á veggi skólans. Í framhaldinu erum við öll í skólanum komin í jólaskap sem við látum endast inn í jólaleyfið. Í tilefni skreytingadagsins var skólinn opinn síðdegis og Foreldrafélagið hélt sitt árlega aðventukvöld fyrir fjölskyldur hverfisins. (HÁ)

Miðvikudaginn 26. nóvember fór 10. R í sjóferð á skólaskipinu Dröfn.  Fyrst fengum við almenna fræðslu um björgunarbúnað um borð og notkun hans. Þegar við komum niður í vinnslusal voru okkur kynnt helstu veiðarfæri og notkun þeirra. Eftir það var haldið í setustofu þar sem líffræðingur hélt fyrirlestur um fæðukeðjuna í hafinu, helstu nytjafiskistofna og hvali. Því næst var farið upp í brú og skipstjóri sýndi okkur helstu stýritæki, tölvubúnað og fiskileitartæki. Að lokum var svo siglt út fyrir Engey og trollpokinn látinn gossa og togað um stund. Pokinn var svo dreginn inn og afrakstrinum hellt niður í vinnslusal. Við fórum svo niður og gerðum að aflanum ásamt tveimur starfsmönnum skipsins og lífræðingnum sem stóð fyrir smá fræðslu vegna þeirra heppni okkar að hafa veitt litla skötu.  Annars var aflinn aðallega þorskfiskur og eftir aðgerð var öllum velkomið að taka með heim fisk í soðið. Ferðin gekk í alla staði vel og krakkarnir voru til fyrirmyndar í hegðun og allri þátttöku (AG)

Rimaskóli hefur komið fyrir sýningu á gömlum námsbókum í einum af sýningarskápum skólans. Bækurnar eru úr námsbókasafni Helga skólastjóra. Þarna er að finna námsbækur frá síðustu öld. Sú elsta er frá árinu 1927 en þær yngstu frá skólaárum skólastjórans. (HÁ)

Á degi íslenskrar tungu fór fram afhending íslenskuverðlauna menntaráðs Reykjavíkur. Í ráðhúsinu voru nemendur í grunnskólum borgarinnar verðlaunaðir fyrir framúrskarandi árangur í íslensku.  Frú Vigdís Finnbogadóttir er verndari verðlaunanna og afhenti hún nemendum forkunnarfagran grip að gjöf.  Ein stúlka í Rimaskóla hlaut þessi verðlaun Arna Steinunn Jónasdóttir  í 7 – C  fyrir að sýna íslenskri tungu mikinn áhuga og vanda málfar sitt bæði í ræðu og riti.

Innilega til hamingju með þessa viðurkenningu Arna Steinunn

Grenndarskógur Rimaskóla er í landi Brekku, innst í Grafarvogi. Þarna var áður sumarbústður og eigendur bústaðarins lögðu mikinn metnað við að planta þar trjám af öllum hugsanlegum tegundum. Nemendur Báru í 4-C heimsóttu skóginn nýverið og kynntu sér alla þá möguleika sem skólaskógurinn býður upp á til útikennslu. Heitt kakó var á boðstólum, krakkarnir fóru í leiki og fundu sér efnivið í smíðaverkefni og textílvinnu. Ferð krakkanna var frábærlega skipulögð af Báru, Halla smíðakennara, Jónínu myndlistarkennara og Siv Heiðu textílkennara. (HÁ)

Vel tókst til hjá nemendum og kennara 7-B þegar þau sáu um föstudagsfjörið á sal skólans. Rauðhetta mætti þarna til leiks ekki alveg eins saklaus og í ævintýrinu. Hún skrópaði í skólanum og var með óhollt nesti í körfunni. Rauðhetta sá þó að sér í lokin og allt fór vel. Sjónvarpsauglýsingar sem krakkarnir sýndu virtust sannfærandi. Eftir spennandi endursýndan úrslitaleik frá Ól. í sumar féll allt í frið og spekt og salurinn kirjaði saman "Imagine" lag e. John Lennon. Takk fyrir skemmtunina 7-B. (HÁ)

Þriðjudaginn 25. nóvember standa náms- og starfsráðgjafar grunnskólanna í Grafarvogi og á Kjalarnesi fyrir sameiginlegri kynningu á framhaldsskólum í Reykjavík. Kynningin verður haldin í sal Borgarholtsskóla frá kl. 18:00 – 20:00. Þeir skólar sem verða með kynningarbás  eru: Borgarholtsskóli, Fjölbrautaskólinn við Ármúla, Fjölbrautaskólinn í Breiðholti, Kvennaskólinn í Reykjavík, Menntaskólinn við Hamrahlíð, Menntaskólinn Hraðbraut, Menntaskólinn í Kópavogi, Menntaskólinn í Reykjavík, Menntaskólinn við Sund, Verslunarskóli Íslands og Tækniskólinn, skóli atvinnulífsins.  Auk þess munu aðilar frá Miðgarði, þjónustumiðstöð Grafarvogs og Kjalarness, kynna þjónustu sína.

Nemendur Rimaskóla sýndu atriði sitt í fyrsta undanriðli Skrekks í Borgarleikhúsinu. Skrekkur er hæfileikakeppni grunnskóla sem nú er haldin 19. árið í röð. Atriði Rimaskóla fjallaði um brúðkaup og afdrifaríka brúðkaupsferð í kjölfarið. Hótelið reyndist hálfgert hryllingshótel. Þrátt fyrir að atriðið kæmist ekki áfram í úrslitin þá stóðu krakkarnir sig mjög vel á fjölum Borgarleikhússins og þrotlausar æfingar skiluðu viðunandi árangri. Kennararnir Baldur og Stefanía voru krökkunum til aðstoðar við verkefnið. (HÁ)

Nemendur 9. bekkjar tróðu upp á fimmtudagsfjöri í Rimaskóla með frábær skemmtiatriði. Söngur og tískusýning gladdi áhorfendaskarann enda um englaraddir og toppklæðnað að ræða. Tvö myndbönd voru frumsýnd á risatjaldinu og fóru leikendur og tökumenn á kostum með drama og spennuefni frá upphafi til enda. Allar filmstjörnunar mæltu á danska tungu og vart hægt að greina á framburði leikaranna að hér væru íslenskumælandi nemendur Rimaskóla á ferðinni. Glæsileg skemmtun hjá ykkur krakkar. Fleiri foreldra næst. (HÁ)

Nemendur 9. bekkjar ásamt umsjónarkennurunum Ninnu, Frey og Baldri tóku þátt í Forvarnadeginum 6. nóvember 2008. Krakkarnir horfðu á myndband, tóku þátt í Netratleik og unnu veggspjöld með slagorðum gegn öllum vímuefnum og dópi. Dagskráin hófs á sal skólans þar sem Helgi skólastjóri og Daníel frá Bandalagi íslenskra skáta ávörpuðu krakkana. Boðskapurinn er skýr til krakkanna; forðist neyslu fíkniefna í lengstu lög, eigið samverustundir með fjölskyldunni og stundið íþróttir og uppbyggjandi félagsstarf. (HÁ)

Nemendur í 5-A urðu mjög uppnumin þegar þeim var boðið að skoða fjölbreytilega fiska sem veiðst höfðu í botnvörpunet á togaranum Hrafni Sveinbjarnarsyni. Einn pabbinn og bátsverji á togaranum mætti með fenginn í kennslustofu barnanna og þar lágu fiskarnir ferskir uppi á borði. Steinbítar, háfar, grálúða, hlýri, langa, karfi og risasmokkfiskur með útstæð augu voru þarna fiska á meðal. (HÁ)

Grunnskólamóti Reykjavíkur 7. bekkja í knattspyrnu 2008 er lokið með glæsilegum sigri Rimaskóla í stúlknaflokki. Þetta er í fyrsta sinn sem Rimaskóli vinnur skólamót í knattspyrnu og stelpurnar knáu því að skrá nöfn sín á spjöld sögunnar. Stúlkurnar sem skipa þetta firnasterka lið unnu lið Seljaskóla í hreinum úrslitaleik 2-1. Þær hafa síðustu árin verið með boltann á tánum í flestum frímínútum og það kom því ekki á óvart að þær yrðu meistarar. (HÁ)

Gönguhópur foreldra og forráðamanna

Gönguhópur foreldra og forráðamanna, eins og við kjósum að kalla foreldraröltið núna, hefur farið vel af stað í haust. Laugardagskvöldið 18. október voru vaskir foreldrar og forráðamenn barna úr 4C mættir í gönguna. Í fallegu svölu haustveðri var rölt um hverfið okkar. Það voru ekki margir á ferli en slatti af unglingum við 10/11. (MGG)

Þriðjudaginn 7. október hittust nýkjörnir bekkjarfulltrúar á kennarastofunni í Rimaskóla. Tilefni fundarins var að kynna fyrir þeim foreldrafélagið og til hvers væri ætlast af bekkjarfulltrúum. Einnig var hópnum skipt upp í 3 hópa þar sem settar voru á blað hugmyndir um hvað hægt væri að gera til að efla bekkjarsamstarfið. Um 50 bekkjarfulltrúar komu á fundinn. (MGG)

Það var eintómt fjör og grín sem 5-A bauð upp á á föstudagsfjöri bekkjarins þann 10. október. Hressilegir söngvar, frábærar kynningar og sprenghlægilegir brandarara fuku af vörum krakkanna. Nemendur 5. - 7. bekkjar skemmtu sér vel og ánægjulegt var að sjá hversu margir foreldrar og ættingjar gáfu sér tíma til að heimsækja skólann af þessu tilefni. Til hamingju krakkar í 5-A með frábæra sýningu. (HÁ)

Íslandsmót skákfélaga ,fyrri hluti, var haldið í Rimaskóla helgina 3. - 5. október. Keppt var í 1. - 4. deild og mættu 54 skáksveitir til keppni alls á fimmta hundrað skákmanna. Á mótinu tefldu skákmenn á öllum aldri, allt frá byrjendum og upp í ofurstórmeistara, innlenda sem erlenda. Nemendur 10. bekkjar stóðu sig frábærlega í veitingasölunni og fengu óspart lof fyrir góða þjónustu og hagstætt fæði.(HÁ)

Háskólinn í Reykjavík býður upp á námskeið í Ólympíustærðfræði fyrir grunnskólabörn í 5. - 8. bekk, yngri nemendur geta tekið þátt hafi þau sérstakan áhuga. Ólympíustærðfræði eru þrautir sem settar eru fram í formi keppna. Þær reyna á hugmyndaflug og rökhugsun. Þetta eru skemmtileg og krefjandi verkefni fyrir þá sem hafa gaman af að glíma við þrautir og að reikna. Áhersla er lögð á ánægju af stærðfræði, innsæi og samvinnu. Bæklingar eru sendir heim með nemendum eins er hægt að skoða upplýsingar á heimasíðu námskeiðsins, hr.is/os

Nemendur á unglingastigi verða með fimmtudagsfjör í vetur á svipuðum nótum og föstudagsfjör yngri bekkja sem slegið hefur í gegn á yngri stigum. Það voru nemendur í 8. bekk sem skemmtu skólasystkinum sínum og foreldrum á fyrsta fjörinu. Eins og meðfylgjandi myndir sýna þá tókst vel til í alla staði með fyrsta fimmtudagsfjörið. (HÁ)

Á vísindadegi Rimaskóla fóru nemendur 5. bekkjar í árlega haustferð. Við Heiðartjörn rétt við Úlfljótsvatn gróðursettu krakkarnir birkihríslur í skólaskóg Rimaskóla. Þau lærðu fyrst handbrögðin og settu plönturnar síðan niður af mikilli kunnáttu og af vandvirkni. Rigningin féll á fimmtubekkinga á meðan á verkinu stóð en kom ekki í veg fyrir að þau lykju verkefninu með miklum sóma. (HÁ)

Nemendur 8. bekkjar Rimaskóla fóru í skólaferðalag í Vatnaskóg yfir eina nótt. Skógurinn bar nafn með rentu þennan tíma því það rigndi nær allan tímann og hafði gert í tvær vikur. Aðstaðan í Vatnaskógi býður upp á mikla fjölbreytni varðandi afþreygingu og létu krakkarnir bleytuna ekkert stoppa sig í að njóta ferðalagsins saman í góðum hópi. Vinsælast var að fara út á bátana og leika sér í íþróttahúsinu. Krakkarnir gerðu matnum góð skil og skemmtu sér frábærlega á kvöldvökunni. Ferðin var nemendum 8. bekkjar til mikils sóma. (HÁ)

Skemmtilegir gestir

Fimmtudaginn 18. september fengum við í Rimaskóla góða gesti. Strákahópur úr leikskólanum Lyngheimum kom að heimsækja okkur. Okkur til mikillar gleði. Strákarnir höfðu heyrt af því að hér í Rimaskóla  væru margir bikarar sem gaman væri að skoða og auðvitað tókum við mynd af  þeim við bikaraskápana. Við þökkum strákunum og kennurunum þeirra fyrir innlitið og vonum  að þeir komi sem fyrst aftur í heimsókn til okkar (GÓG).

Unglingadeildin fékk að upplifa, njóta, kanna, hanna og skoða ýmislegt tengt vísindum á Vísindadaginn. Áttundubekkingar fengu að upplifa himingeiminn í gegnum Stjörnuverið sem er uppblásin kúla með tölvuforriti og vídeókerfi sem lýsir ferlum himnhnatta og geimfyrirbæra á sjónrænan hátt. Þeir gerðu einnig vísindalega könnun á húmor Rimskælinga ásamt því að skoða næringargildi matvæla. Níundu bekkingar hönnuðu farartæki úr legokubbum sem átti að leysa ákveðna þraut, þeir fengu að æfa sig í skyndihjálp með því að blása og hnoða skyndihjálparbrúðu, þeir skoðuðu Morgunblaðið og athuguðu allir fréttir sem tengjast vatni og fóru að lokum í heimsókn í Hellisheiðarvirkjun. Þar fengu nemendur höfðinglegar móttökur og voru að sjálfsögðu til fyrirmyndar, enda allir leystir út með gjöfum frá Orkuveitunni.  Tíundubekkingar fóru í stöðvaþrautir tengdum dýrum og fóru að lokum í heimsókn í Húsdýragarðinn þar sem þeir fengu að kynnast atferlisrannsóknum á villtum íslenskum spendýrum ásamt því að upplifa Vísindaveröldina og tilraunum sem þar er í boði, t.d. hver getur öskrað hæst? Allir kennarar unglingadeildarinnar voru kampakátir með Vísindadaginn og unglingarnir okkar til sóma hvar sem þeir voru að störfum. (JÓ)

Vísindadagurinn var miðvikudaginn 17. september og tókst í alla staði vel. Vatnið var viðfangsefni hópsins. Unnið var með hugtökin flýtur og sekkur. Verkefnið fólst í ágiskun og siðan sönnun þar sem nemendur fengu að prófa hvort ágiskunin var sönn eður ei. Eitt af meginverkefnum vísindadagsins er að vinna með forhugmyndir nemenda um vísindi og er ætlast til þess að hópstjóri ræði við nemendur um viðfangsefnin.  Mikilvægt er að nemendur fái tækifæri til að snerta og koma að verkefnavinnunni sem og að koma hugsunum sínum í orð eða á blað.   Bekkjunum var skipt í tvo hópa og verkefni brotin upp á ýmsa vegu.  Eins og sést á myndunum virtust nemendur skemmta sér hið besta og njóta þeirra viðfangsefna sem boðið var upp á (GÓG).

Föstudagsfjör 7. A var sannkölluð skemmtun. Nemendur sýndu dans, frumsamið leikatriði sem unnið var að hluta úr námsefni í íslensku og sungu í lokin.  Það var virkilega gaman að sjá og upplifa þann mikla metnað  og þann áhuga sem nemendur og umsjónarkennarinn þeirra hún Eygló höfðu, þolinmæði á æfingum og undirbúningur í alla staði til fyrirmyndar. Þau lögðu sig öll 100% fram og afraksturinn eftir því, Föstudagsfjörið var hreint út sagt stórkostlegt.  Framkvæmdin á föstudagfjöri er í stórum dráttum þessi:Einn ákveðinn bekkur sér um fjörið og býður bekkjum á sínu stigi, bekkirnir fá boðskort á fjörið, einnig bjóða þau foreldrum sínum á fjörið.  Á yngsta stigi eru 1, 2, 3 og 4 bekkur og á miðstigi eru 5, 6 og 7 bekkur. Starfsfólk mötuneytis hefur bakað kleinur og hafa þeir bekkir sem sjá um fjörið boðið foreldrum sínum upp á veitingar í lokin. Það  er ánægjulegt að sjá hve margir foreldrar mættu á fjörið . Þessi góða byrjun á föstudagfjöri lofar góðu og nú bíðum við öll spennt eftir næsta fjöri sem verður sem verður föstudaginn 3. október og þann dag verða tvö „fjör“ annars vegar 6A og hins vegar 3A (GÓG).

Þann 8. september fór af stað verkefnið Skólavinir. Segja má að verkefnið hafi hafist í fyrra en á vordögum var Skólavinaverkefninu ýtt úr vör. Skólavinir gegna mikilvægu hlutverki,  megin tilgangur verkefnisins er ekki síst að móta eðlileg samskipta- og vinnáttutengsl milli nemenda í 1. til 3. bekk og þeirra sem eldri eru. Sú miðlun sem fram fer í frímínútum og hádegi er ómetenleg, skólavinir fara í leiki með nemendum, leysa úr ágreiningi og síðast en ekki síst gefa sig á tal við yngstu nemendur skólans, sýna þeim áhuga auk þess að kynna sig og kynnast þeim. Starfsfólk skólans lýsir yfir mikilli ánægju með verkefnið og Skólavinina sem hafa staðið sig  einstaklega vel,  verið sér og skólanum sínum til mikils sóma (GÓG).

Haustferð 10. bekkja var farin í Þórsmörk dagana 11. og 12. september.  Ferðin tókst í alla staði mjög vel og voru krakkarnir til fyrirmyndar og fengu gott hrós frá staðarhöldurum. Fyrri daginn var stoppað við Seljalandsfoss á leið inn í Þórsmörk. Þegar komið var í Húsadal og fólk búið að koma sér fyrir var gengið yfir í Langadal með viðkomu í Snorraríki þar sem fólk spreytti sig á klettaklifri. Eftir það var gengið á Valahnjúk og þaðan yfir í Húsadal. Frjáls tími var fram að kvöldmat, en þá grilluðu allir saman á pallinum við matarhúsið.  Eftir kvöldmat var haldin kvöldvaka þar sem krakkarnir lögðu sig fram við að skemmta sjálfum sér og öðrum og Kristinn, Oddur, Hlynur og Kolbeinn sáu um tónlistina. Um þrjúleytið voru allir komnir í ró. Við starfsfólk og foreldrar sem fórum með krökkunum þökkum þeim fyrir frábæra ferð.
Kveðja,  Auður, Hrafnhildur, Lilja, Njörður, Oddur, Viktor og Margrét.

Hlaupasveit Rimaskóla undir styrkri stjórn Eyrúnar Ragnarsdóttur íþróttakennara vann með yfirburðum grunnskólahlaupið á Grafarvogsdeginum 13. September. Í ausandi rigningu og roki mættu krakkarnir 20 sem skipuðu sveit Rimaskóla til leiks og lögðu sig alla fram fyrir hönd skólans. Auk skólastjóra voru nær allir foreldrar barnanna mættir og hvöttu sveitina til dáða. Glæsilegur árangur og gullbikararnir streyma í skólann. Frábært krakkar í 1. - 10. bekk. Fjórir sigrar á fjórum árum. Skólinn fékk eignabikar fyrir þrjú fyrstu árin og héldu glæsilegum farandbikar til varðveislu eitt árið enn. (HÁ)

Þorgerður Katrín Gunnarsdóttir menntamálaráðherra bauð skáksveit Rimaskóla, Norðurlandameisturum grunnskóla 2008, til glæsilegrar móttökuathafnar í Þjóðmenningarhúsinu. Viðstaddir voru auk ráðherra og yfirmanna ráðuneytisins, formaður Menntaráðs Reykjavíkur, fræðslustjóri, forystumenn skákhreyfingarinnar, foreldrar krakkanna og starfsmenn Rimaskóla. Menntamálaráðherra fór mjög lofsamlegum orðum um frábæran árangur krakkanna og öflugt skákstarf Rimaskóla. Hún afhenti liðsmönnum Rimaskólasveitarinnar glæsilega bókargjöf. Kjartan Magnússon formaður Menntaráðs færði Rimaskóla 10 skákklukkur að gjöf frá Borgarstjórn Reykjavíkur. Björn Þorfinnsson forseti Skáksambandsins flutti ávarp og fór lofsamlegum orðum um árangur Rimaskóla á sviði skáklistarinnar. Helgi Árnason skólastjóri þakkaði ráðherra frábærar móttökur og afhenti henni 1. eintakið af bókinni "Leiðin að gullinu" sem lýsir frábærum árangri skáksveitar Rimaskóla á öllum skákmótum skólaárið 2007 - 2008. (HÁ)

Á skólamóti Fjölnis í handbolta þann 6. september mættu krakkarnir í 4. og 6. bekk fjölmennust til leiks frá Rimaskóla. Undir stjórn þeirra Eyrúnar og Valdimars íþróttakennara stóðu þessir bekkir sig frábærlega og unnu sína aldursflokka örugglega. Það var stoltur og samstæður hópur nemenda í 4-B og 6-A, 6-B og 6-C sem mætti á mánudegi með glæsilega bikara í skólann fyrir sigur á skólamótinu. (HÁ)

Íslandsmeistararsveit Rimaskóla í skák náði þeim einstaka áfanga að  hreppa gullið á Norðurlandamóti grunnskóla sem fram fór í Osló dagana 29. - 31. ágúst. Rimaskóli vann mótið örugglega og kórónuðu góða frammistöðu með því að leggja dönsku meistarana 4- 0 í síðustu umferð. Fremstur í flokki skáksveitarinnar er Hjörvar Steinn Grétarsson sem enn og aftur sannar að hann er besti skákmaður Norðurlanda í sínum aldursflokki og þó víðar væri leitað. Hjörvar Steinn fékk borðaverðlaun á 1. borði og Sigríður Björg helgadóttir stóð sig best allra á 3. borði. Ánægjulegastur var Þó árangur yngstu strákanna þeirra Dags Ragnarssonar og Jóns Trausta Harðarsonar sem tefldu nánast óaðfinnanlega. Til hamingju Rimaskóli.(HÁ)

Hátíðleg útskriftarhátíð 10. bekkjar fór fram í sal Rimaskóla miðvikudaginn 4. maí. Útskriftarnemendur og ættingjar þeirra fjölmenntu í hátíðarskapi. Skólastjóri hélt ræðu og fór yfir helstu viðburði vetrarins í skólastarfinu. Björn Logi 10-T formaður nemendaráðs flutti ávarp og Sigríður Björg 10-R lék á fiðlu verk eftir Mozart. Viðurkenningar voru veittar fyrir góðan námsárangur og félagsstörf. Marta aðstoðarskólastjóri kvaddi börnin fyrir hönd skólans. Í lokin þáðu gestir glæsilegar veitingar í boði foreldra. (HÁ)

Hjálparstarfi kirkjunnar voru afhent ungbarnaföt sem nemendur 8.bekkjar Rimaskóla útbjuggu í textílmennt á vormisseri 2008. Þetta er í 4. skipti sem fermingarnemendur skólans færa Hjálparstarfinu álíka gjöf.Um er að ræða hentugan flísfatnað sem nemendur gefa til innanlandsaðstoðar. Alma Ernstdóttir er kennari krakkanna. Húnafhenti Jónasi Þ. Þórissyni og Vilborgu Oddsdóttur gjöfina með kærrikveðju frá nemendum sem voru komnir í sumarleyfi. Auk Ölmu var Helgiskólastjóri viðstaddur afhendinguna fyrir hönd Rimaskóla. (HÁ)

Það var hátíðarblær yfir skólaslitum nemenda á yngsta og miðstigi. Nemendur, ásamt fjölmörgum foreldrum og öðrum aðstandendum, áttu góða stund saman á hátíðarsal skólans. Þar var farið stuttlega yfir skólaárið, nemendur hvattir til dáða á næsta skólari og viðurkenningar veittar fyrir stundvísi. Þá fengu skólavinir úr hópi 11 ára nemenda viðurkenningu frá ÍTR fyrir vel og samviskusamlega unnið verkefni. Í athöfninni var sungið og var góður og einlægur samhljómur í röddum nemenda, foreldra og starfsfólks skólans. Megi sá samhljómur endast sem lengst. Að athöfninni lokinni fóru nemendur með sínum umsjónarkennurum í heimstofur og fengu afhentan vitnisburði skólaársins og viðurkenningar.(EBÞ)

Glæsileg afmælishátíð var haldin í Rimaskóla föstudaginn 30 .maí í tilefni af 15 ára afmæli skólans. Hátíðin hófst með pítsuveislu í boði skólans. Auk pítsunnar þá færði Rimaskóli með stuðningi Hróa hattar öllum nemendum skólans að gjöf jójó með merki skólans 15 ára. Skólahljómsveit Grafarvogs undir stjórn Einars Jónssonar og þjóðlagasveit Tónlistarskóla Grafarvogs undir stjórn Wilmu Young spiluðu á  hátíðarsvæðinu. Síðan tók við tveggja tíma skemmtidagskrá nemenda í íþróttahúsi skólans þar sem meirihluti krakkanna sýndi hæfni sína í tónlist og söng. Júlíus Vífill Ingvarsson formaður Menntaráðs Reykjavíkur var heiðursgestur afmælishátíðarinnar og skemmti hann sér konunglega að eigin sögn. Júlíus  hélt ávarp og færði skólanum myndarlegan blómvönd. Helgi Árnason skólastjóri frá upphafi skólans flutti ávarp og rifjaði upp fyrstu verk sín í starfi skólastjóra sem voru m.a. að velja skólanum einkunnarorð og láta hanna merki skólans, verk sem ennþá standa í fullu gildi.  Íslandsmeistarar Rimaskóla í skák buðu gestum upp á tafl sem að  fjölmargir gestir þáðu. Í hátíðarsal Rimaskóla var einstaklega glæsileg sýning á verkefnum nemenda í myndlist, textíl og smíði. Uppsetning muna og fjölbreytileiki verka heillaði alla gesti skólans.  Að lokum bauð Foreldrafélag Rimaskóla öllum nemendum aðgang að hoppukastala og þátttöku í árlegu Rimaskólahlaupi. Í tilefni afmælisins voru vígðir vandaðir sýningaskápar sem að mestu er gjöf Foreldarfélags Rimaskóla til skólans. Magnús G.Guðfinnsson formaður Foreldrafélags Rimaskóla afhenti skólastjóra gjöfina. Skáparnir eiga að rúma eggja-steina og plöntusafn Rimaskóla. Það voru Reyðfirðingarnir Óskar og Sæmundur Ágústssynir sem söfnuðu nánast öllum tegundum íslenskra eggja, steina og plantna og ekkja Óskars færði skólanum söfnin að gjöf fyrir nokkrum árum síðan. Í tilefni afmælisins sungu nemendur 4.- 6. bekkjar nokkur lög inn á geisladisk og kom diskurinn út í kringum afmælishátíðina. (HÁ)

Rúmlega 50 nemendur Rimaskóla á öllum aldri tóku þátt í hinu árlega skákmóti Rimaskóla sem haldið var í 15. sinn eða allt frá stofnun skólans. Tefldar voru sjö umferðir og umhugsunarfrestur var sjö mínútur. Líkt og undanfarin ár þá vann Hjörvar Steinn Grétarsson mótið og fékk afhendan Rimaskólabikarinn sem á eru rituð nöfn allra skákmeistara skólans frá upphafi, skólaárið 2003 - 2004. Mótið var velskipað enda mikið afreksfólk í Rimaskóla; Norðurlandameistarar, Íslandsmeistarar stráka og stúlkna og margfaldir Reykjavíkurmeistarar. Sigríður Björg Helgadóttir varð efst stúlkna. Veitt voru 25 glæsileg verðlaun, geisladiskar frá Skífunni og pítsur frá Hróa hetti. Skákstjórar voru Helgi skólastjóri, Sólmundur gangavörður og Þór stuðningsfulltrúi. (HÁ)

Hinir efnilegu skákmenn Rimaskóla í barnaskólaflokki voru sérstakir gestir borgarstjóra Reykjavíkur í Höfða þegar stofnsamningur að Skákakademíu Reykjavíkur var undirritaður að viðstöddum fjölda gesta. Strákarnir stóðu sig frábærlega þegar þeir tóku stutt hraðskákmót og tefldu við Ólaf F. borgarstjóra, Hrafn Jökulsson forseta Hróksins, Björn Þorfinnsson forseta Skáksambandsins og fleiri framámenn í skákhreyfingunni. (HÁ)

Upphaf á Skákakademíu Reykjavíkur var hraðskák Ólafs F. Magnússonar borgarstjóra við hinn efnilega skákmann Jón Trausta Harðarson í 5-A Rimaskóla. Borgarstjóri tefldi mikið á sínum æsku-og unglingsárum og var m.a. í öflugri skáksveit MH á sínum tíma. Það sýndi sig fljótt að borgarstjóri hafði litlu gleymt í skáklistinni. Jón Trausti reyndist hins vegar ekkert lamb að leika við. Fjöldi veislugesta í Höfða, móttökusal borgarstjórnar fylgdist með æsispennandi og veltefldri skák sem endaði með sanngjörnu jafntefli. (HÁ)

6. bekkir á Úlfljótsvatni

6. bekkir skólans dvöldu á Úlfljótsvatni dagna 13. – 15. maí. Dvölin er liður í lífsleikninámi nemenda. Skemmst er frá því að segja að ferðirnar heppnuðust vel og stóðu nemendur sig með prýði. Margt var við að vera enda skipulagt af skátum sem reka staðinn.(EBÞ)

Hópur nemenda úr 4., 5. og 6. bekkjum gerði ferð í hljóðver Magnúsar Kjartanssonar hljómlistarmanns. Þar söng hver hópur 2 – 3 lög af þeirri  innlifun sem hverjum og einum er gefin á sviði tónlistarinnar. Nemendum fannst skemmtileg upplifun að koma í hljóðverið og sjá hvernig hljóðritun fer fram. (EBÞ)

Í byrjun apríl fór af stað verkefnið Skólavinir. Nemendur 6. bekkja hafa sinnt verkefninu og gert það almennt mjög vel. Yngstu nemendur njóta frumkvæðis og vináttu 6. bekkinga í frímínútum. Starfsfólk skólans hefur lýst yfir ánægju sinni með frammistöðu Skólavinanna.  Helsti tilgangur verkefnisins er að móta eðlileg samskipta- og vináttutengsl milli yngstu nemenda og þeirra sem eldri eru.(EBÞ)

Þann 15. maí var móttöku- og upplýsingafundur fyrir foreldra og nemendur sem hefja sína skolagöngu í 1. bekk næsta skólaár.  Stjórnendur og fagfólk innan skólans kynnti foreldrum mikilvæga þætti skólastarfsins og  “nýnemarnir” nutu á með öruggrar leiðsagnar kennara yngstu barna.  Í lokin var sungið og boðið upp á veitingar.  Góður andi ríkti á móttökufundinum og var ekki annað að sjá en nemendur væru tilbúnir að takast á við skólastarfið. (EBÞ)

Fuglavernd kynnti íslenska fugla

Einar Þorleifsson, fuglafræðingur frá félaginu Fuglavernd kom í heimsókn og flutti skemmtilegt erindi um íslenska fugla. Jafnframt sýndi hann með erindinu myndir á stóru tjaldi og nokkrar tegundir fuglahúsa. Allir nemendur frá 6 til 12 ára komu og hlustuðu á Einar og spurðu af áhuga spurninga um íslenska fugla. (EBÞ)

Foreldraheimsóknir tókust vel.

Umsjónarkennarar 1. – 7. bekkja buðu foreldrum að koma í heimsókn í skólann á kennslutíma á tímabilinu frá mars til maí. Heimsóknirnar heppnuðust vel enda mæting almennt góð og jafnvel mjög góð. Þessi þáttur í jákvæðum samskiptum heimila og skóla fór því vel af stað og gefur góð fyrirheit um framhald á næsta skólaári.(EBÞ)

Boltar fyrir alla

Allir bekkir frá 1. til 7. bekkjar fengu afhenta til varðveislu boltapoka. Í honum eru boltar af ýmsum stærðum og gerðum. Á Barnaþingi Rekjavíkurborgar kom fram hjá fulltrúum 6. bekkja skólans að þörf væri á þessum nauðsynlegu leiktækjum. Skrifstofustjóri Rimaskóla brást jákvætt við og hafði forgöngu um innkaup á boltaflóði sem bekkirnir fengu til afnota.(EBÞ)

Nemendur í íþróttafræði í 9.bekk fá að velja sér vettvangsferð til að upplifa nýja hreyfireynslu. Hestaferð með Íshestum varð fyrir valinu að þessu sinni. Það voru 25 krakkar sem mættu hressir í frábæru veðri síðasta vetrardag og fóru í klukkustundar reiðtúr nálægt Kaldárseli. Eftir reiðtúrinn hrósaði fararstjórinn þeim í hvívetna.  Hann sagði krakkana vera frábæra, sumir sýndu glæsilega reiðtakta, aðrir mjög efnilegir, allir fóru eftir fyrirmælum og báru með sér góðan þokka en umfram allt voru allir skólanum sínum til sóma. Svo sannarlega var það glaður og hreykinn kennari sem fór heim með þennan frábæra vitnisburð. JÓ.

Vegna mikilla verðhækkana á landbúnaðarvörum frá 1. apríl síastliðinn þá reynist það mötuneyti Rimaskóla nauðsynlegt að hækka verð á þeim mjólkurvörum sem skólinn selur nemendum. Hækkunin gildir frá mánudeginum 21. apríl. (HÁ)

Nemendur 8-R tóku stofu 46 í gegn og þrifu allt krot af borðum, stólum, veggjum, gluggakistu og ofninum. Síðan máluðu þau korktöfluna gulllitaða og skreyttu að lokum stofuna með stórum fallegum blómalímmiðum. Það er allt annað að sjá stofuna, sem er ensku- og dönskustofa krakkanna. Þau eru til fyrirmyndar og eiga mikið hrós skilið. (MI)

Kokkakeppni grunnskóla Íslands 2008

Kokkakeppni grunnskóla Íslands 2008 fór fram í Menntaskólanum í Kópavogi laugardaginn 12. apríl síðastliðinn.  Þetta ár tóku 16 skólar þátt í keppninni og sem dæmi um grósku í skólastarfi í Grafarvogi má benda á að af þessum skólum voru 7 skólar úr Grafarvoginum. Sá skóli sem kom lengst að kom alla leið frá Sauðarkróki og vonandi verða nemendur í Árskóla öðrum hvatning að ári og fleiri landsbyggðarskólar sjá sér þá fært að taka þátt.  Ásdís, Ástrós, Birta og Kristín Björk elduðu réttinn Íslandssól, nætursaltaðan þorskhnakka með síruskúskús og stóðu sig ákaflega vel en sigur úr bítum bar Hvaleyrarskóli.

Foreldraheimsóknir  á mið- og yngsta  stigi fara vel  af  stað, en þær hófust hjá 2. - 6. bekk sl. mánudag. Foreldrar líta við í kennslustundum barna sinna og fylgjast með því sem þar fer fram. Þetta innlit foreldra er mjög jákvætt og eflir samstöðu heimila og skóla auk þess sem það er nemendum mikil og góð hvatning. (EBÞ)

Hópur stúlkna úr 6. bekkjum söng í upphafi íbúaþings borgarstjóra í Rimahverfi sl. laugardag. Þær sungu tvö lög Ó, borg mín borg og Yndislegt líf. Söngurinn heppnaðist mjög vel og öll framkoma nemendanna var þeim og skólanum til mikil sóma. Ljósmyndari Fréttablaðsins, Pjetur Sigurðsson, tók mynd af hópnum með borgarstjóra. (EBÞ)

Hin öfluga skáksveit Rimaskóla sem nýlega varð Reykjavíkurmeistari gerði enn betur um helgina og hampaði Íslandsmeistaratitli grunnskólasveita í æsispennandi móti 27 skáksveita. Sveitin hlaut 32 vinninga, einum vinningi meira en sveit Salaskóla. Verðug verkefni bíða krakkanna. Þau taka þátt í Evrópumóti grunnskólasveita í Búlgaríu í sumar og Norðurlandamóti grunnskólasveita í Noregi í haust. Til hamingju með frábæran árangur. (HÁ)

Nemendur 4. B. sáu um Föstudagsfjörið 11. apríl. Dagskráin var frábær og vel flutt. Hún var samblanda af leik, söng, hljóðfæraleik, leiknum sögum og bröndurum. Frammistaða nemenda var frábær.  Foreldrar og aðrir aðstandendur nemenda fjölmenntu á sal og höfðu mikið gaman að. Í lokin þáðu þeir kaffi og kleinur að hætti hússins (skólans). Nemendur á sal voru eins og áður til mikillar fyrirmyndar í allri hegðun og framkomu. (EBÞ)

Umsjónarkennarar og nemendur 2. - 6. bekkja hafa boðið foreldrum og forráðmönnum bekkjanna að koma í stuttar heimsóknir á skólatíma í apríl.  Tilgangur þessa heimboðs er að efla samskipti skóla og heimila og kynna foreldrum og forráðmönnum þann náms- og bekkjaranda sem ríkir á venjulegum skóladegi.  Umsjónarkennarar og nemendur 1. og 7. bekkja hafa þegar lokið við að taka á móti foreldrum í heimsókn. Þær heimsóknir heppnuðust sérlega vel.(EBÞ)

Í vikunni hófst verkefnið Skólavinir sem 6. bekkingar annast. Fyrsta vikan lofar mjög góðu og sinntu Skólavinir vikunnar verkefninu af mikilli ábyrgð, ánægju og heiðarleika. Verkefnið er fólgið í því að leika við og líta til með yngstu skólafélögunum í frímínútum. Að þessu sinni var nemendum gefið val um það hvort þeir vildu sinna verkefninu. Yfirgnæfandi meirihluti þeirra var tilbúinn til þess og er ekki að efa að öll framkvæmdin verður þeim til sóma. (EBÞ)

Nemendur og kennarar 6. bekkjar tóku þátt í barnaþingi sem Miðgarður hélt í Gullhömrum í Grafarholti. Öllum skólum í Grafarvogi og á Kjalarnesi var boðin þátttaka á barnaþingi og mættu nemendur frá sex skólum hvefisins.  Krakkarnir í 6. bekk Rimaskóla könnuðu hverfið sitt með tilliti til umgengni, aðstöðu og kosti þess að búa í Rimahverfi. Þau nutu aðstoðar Ellerts Borgars við úrvinnslu. Fulltrúar skólans á Barnaþinginu voru 6. bekkingarnir: Ástrós,Birgitta,Guðrún Stella,Helga, Helga Hjördís. Sara Rut, Aníta, Nanna, Arna Steinunn, Katrín Fjóla, Katrín Birna, Lára Katrín Rakel, Theodór, Bjarklind, Erla, Kristin Lilja, Kristín Helga, Sara og Steinunn. Framlag þeirra á barnaþingi var glæsilega flutt og krökkunum og skólanum til mikils sóma. (HÁ)

Nú fer Vinnuskóli Reykjavíkur að opna fyrir skráningu hjá nemendum. Vinnuskólinn býður unglingum öruggt og hvetjandi starfsumhverfi - ÚTI sem er mikilvægt í okkar stutta íslenska sumri! 

Eldri fréttir

Síðast uppfært 14.01.2009

Rimaskóli  |  Rósarima 11 | 112 Reykjavík  | Sími: 5676464  | fax 5678831   rimaskoli@rimaskoli.is