Nautalund fyllt með gæsalifur og Fondant kartöflum

1. sæti í kokkakeppni Rimaskóla 2007.

Arnar, Kjartan og Sindri.

180 g nautalund

20 g gæsalifur (pate de foie gras)

2 sneiðar úrvalsbeikon

1 msk. smjör til steikingar

Salt og svartur pipar úr kvörn

½ tsk. Armagnac ( koníak eða brandí)

Sósan:

1 dl nautasoð (1 ½ tsk. nautakraftur og 1 dl kalt vatn)

2 tsk. armagnac (koníak eða brandí)

1 dl óáfengt rauðvín

3 msk smjör og 1 tsk. rifsberjasulta

Aðferð:

1. Bankið aðeins ofan á nautalundina með hnefanum og mótið í jafna stærð.
2. Skerið með oddhvössum hníf lítinn vasa í miðja steikina.
3. Látið gæsalifrarkæfuna í vasann og þrýstið vel á.
4. Látið dropa af armagnac eða koníaki inn með gæsalifrinni.
5. Lokið fyrir með tveimur beikonsneiðum.
6. Festið beikonið með tannstöngli svo það haldi gæsalifrinni vel lokaðri inni í nautalundinni.
7. Hitið góða pönnu og þegar hún er meðalheit bræðið þá smjörið.
8. Steikið kjötið við meðalhita, jafn á öllum hliðum til að fá sem jafnasta steikarhúð og góð steikarskóf myndist á pönnunni.
9. Kjötið er steikt í u.þ.b. 1-2 mínútur á öllum hliðum, allt eftir þykkt og stærð.
10. Hellið 1 msk. af armagnac yfir og og kveikið í eða látið sjóða niður.
11. Takið steikurnar af og látið til hliðar á fat. Breiðið álpappír yfir til að halda þeim heitum.

Lagið sósuna:

1. hellið nautakjötssoðinu og rauðvíninu yfir pönnuna og leysið vel upp steikarskófina.
2. Látið sjóða á pönnunni þangað til soðið hefur minnkað töluvert.
3. Bætið rifsberjasultunni í.
4. Bætið þá smjörinu í smátt og smátt og kryddið með salti og pipar eftir smekk .
5. Rétt áður en steikurnar eru bornar fram er þeim velt upp úr sósunni í nokkrar sekúndur og þá má sósan alls ekki sjóða.
6. Látið hverja fyrir sig á disk og og hellið örlitlu af sósu yfir.
7. Berið fram með fondant kartöflum, steiktum sveppum og smjörsvissuðum sykurbaunum. (heilir litlir sveppir eru ristaðir í smá smjöri, eitt hvítlauksrif látið marra með á pönnunni (8 mín og hræra allan tímann) og sykurbaununum bætt í þegar sveppirnir eru nánast tilbúnir (1 mín.)

Fondant kartöflur:

1. Skerið nettar bökunarkartöflur til þannig að þær séu eins og litlar sívalar tunnur.
2. Steikið í litlum háum potti í 1 tsk. olífuolíu þangað til þær taka gylltan brúnan lit.
3. Hellið nautakjötssoði (dl af vatni á móti tsk. af nautakrafti blandað eftir þörfum) yfir þangað til það nær ¾ upp á kartöflutunnurnar í pottinum.
4. Bætið 2 lárviðarlaufum í pottinn.
5. Sjóðið í 25-35 mínútur eða þangað til kartöflurnar eru mjúkar þegar stungið er með beittum oddhvössum hníf í miðjuna á þeim.

______________________________________

Gullið og grænt kjúklingasalat

3. sæti í kokkakeppni Rimaskóla 2006

Sesselía og Vigdís

1 mangó skorið í u.þ.b. 1 cm ferkantaða bita

½ knippi kóríander grófsaxað

1 vorlaukur skorinn smátt

1-2 rauð chilialdin (eftir smekk), fræhreinsuð og fínsöxuð

Safi úr 1-2 límónum (eftir smekk)

2 kaldar steiktar kjúklingabringur skornar í bita

1 fennika (fennikuhöfuð)

Nokkrir dropar ristuð sesamolía

2 tsk. fínrifinn börkur af lime til að skreyta diskinn

AÐFERÐ:

1. Kjúklingurinn steiktur á pönnu og bakaður í ofni í 20 mín. Við 200°C.
2. Kjúklingurinn er kældur og skorinn í litla bita.
3. Mangóið er skorið í u.þ.b. 1 cm bita og hellt í skál.
4. Vorlauk og chilialdin er blandað saman við með höndunum og límónusafi kreistur yfir ásamt sesamolíu.
5. Það má nota eins mikið eða lítið og hver vill, satt að segja er gífurlega mismunandi hvað mikill safi næst úr límónum.
6. Skerið fennikuna í þunnar sneiðar og svo í litla bita og blandið öllu saman
7. Setjið salatið fallega á disk og skreytið með rifnum berki af lime út á rönd disksins.

Parmesan kex

1 dl rifinn parmesanostur

½ msk. hveiti

Blandið hveitinu og rifna ostinum vel saman.

Bakið í 180° heitum ofni (undir/yfirhiti og blástur) í 3-5 mínútur

Setjið ofan á salatið þannig að kexið myndi turn.

______________________________________

Kjúklingastrimlar með tómatmauki og sætri kartöflumús

Ástrós, Ásdís, Birta og Guðfinnur.

2 kjúklingabringur

4 tómatar

1 sæt kartafla

2 hvítlauksrif

1 shallotlaukur

1 blaðlaukur

Ferskt timian (2 greinar)

1rautt chili

½ tsk. hvítlaukssalt í músina (minnka salt á móti)

½ tsk. paprikuduft í músina

Ólífuolía til steikingar og í tómatmauk

Aðferð:

1. Skerið kjúklingabringur í tvennt og steikið og brúnið upp úr olú.
2. Kryddið með svörtum pipar og fíntskornu timían.
3. Setjið inn í 180°C heitan ofn í 10-15 mínútur.

Sæt mús:

4. Afhýðið sætu kartöflurnar og skerið í sneiðar og setjið í sjóðandi heitt vatn þar til kartöflurnar eru soðnar í gegn (nokkrar mínútur).
5. Hellið öllu vatninu af kartöflunum og stappið með gaffli og setjið 1 msk. af smjöri í ásamt hvítlaukssalti. sírópi og fínt söxuðum hvítlauk (u.þ.b. 1 rif). Saltið og piprið eftir smekk.

Tómatmauk:

1. Skerið endana af tómötunum og saxið þá í bita.
2. Saxið shallot laukinn fínt.
3. Saxið timíanið fínt.
4. Saxið 1 hvítlauksrif fínt og rauða chilíið en hreinsið fræin úr því fyrst.
5. Hitið allt í potti og látið malla við vægan hita í 10-15 mínútur.
6. Takið af hitanum og bætið ¼ tsk. af balsamediki í ásamt ½ tsk. af hunangi

• Hreinsið blaðlaukinn vel og skerið í strimla, ca. 2 cm breiða og nokkuð langa.
• Steikið í olíu þangað til strimlarnir byrja að brúnast. Takið þá upp úr og látið hvíla á eldhúspappír meðan olían lekur af. Notið til skreytingar.

Uppsetning:

• Þegar allt er tilbúið takið þá sætu kartöflumúsina og setjið á miðjan disk.
• Þar ofan á kemur tómatmaukið og svo 2 sneiðar af kjúklingnum.
• Reynið að setja kjúklinginn þannig að hann myndi turn.
• Skreytið með blaðlauksstrimlunum.

Gott er að setja nokkra dropa af balsamikediki í tómatmaukið og leyfa því að malla með og líka að setja smá línur af balsamsýrópi hringinn í kring til að skreyta diskinn. Alls ekki of mikið!

______________________________________

Tortellini steikt á taílenska vísu með kjúklingi, engifer, vatnakastaníum og sítrónugrasi með ídýfu

Áróra, Dagný og Lilja

1 þumalstór biti af nýjum engifer, afhýddur

1 hvítlauksgeiri, afhýddur

1 ½ stöngull sítrónugras, ystu blöðin fjarlægð, saxaðir

3 úrbeinuð kjúklingalæri

1 vænn hnefi af fersku kóríander, leggirnir með

1 msk. sesam olía

1 lítið egg (eða hálft slegið egg)

1 kúfuð matskeið maíssterkja (maíssena mjöl)

1 hnefi vatnakastaníur úr dós

Salt og nýmalaður svartur pipar

Heimatilbúið eða keypt pastadeig

Ólífuolía

Aðferð:

1.      Gerið engifer, hvítlauk og sítrónugras að fíngerðu mauki í matvinnsluvél.

2.      Bætið kjúklingakjötinu við og látið vélina ganga í mínútu í viðbót.

3.      Setjið allt sem eftir er út í og blandið saman í rykkjum þangað til deigið er mjúkt og fínt.

4.      Fletjið pastað mjög fínt út og búið til tortellini.

5.      Setjið það í sjóðandi saltað vatn og sjóðið í 3-4 mínútur.

6.      Færði bögglana upp með fiskispaða og setjið þá á heita pönnu með tveimur skvettum af ólífuolíu.

7.      Steikið þar til þeir eru orðnir stökkir og gulbrúnir öðrum megin.

8.      Takið bögglana strax af pönnunni og berið þá fram með dýfunni.

Dýfan:

6 msk. soyjasósa

2 msk. hrísgrjónavínedik eða hvítvínsedik

1 msk. sykur

¼ rauður chili (fræhreinsaður og skorinn í fínar sneiðar)

Nokkur grófsöxuð kóríander blöð

Pistasíu og parmesan þorskhnakki með  papaja og kóríander salati og malt og appelsín sírópi

2. sæti í kokkakeppni Rimaskóla 2007.

Alda R., Helena, María og Viktoría

200 g þorskhnakki

¾ dl fínrifinn parmesanostur                               1 tsk. fínrifinn sítrónubörkur

½ dl muldar pistasíuhnetur                                 ½ tsk. Svartur pipar

½ tsk. Maldon salt

Snyrtið þorskhnakkann.

Myljið pistasíurnar vel í mortéli.

Blandið öllu nema sítrónuberki saman við pistasíurnar.

Veltið fiskinum vel upp úr hnetu og parmesanblöndunni.

Dreypið nokkrum dropum af ólífuolíu yfir fiskinn.

Bakið í ofni við 100°C í 8-10 mínútur eða þar til hann er meðalsteiktur.

Kúskús

100 g kúskús

2 ½ dl kjúklingasoð (2 ½ dl vatn og 1 kjúklingateningur)

1 ½ tsk. sambal oelek (chilimauk)

1 tsk. fínrifinn sítrónubörkur

½ tsk. rautt chili, fræhreinsað og skorið smátt.

Nokkur smátt söxuð kóríanderlauf

Aðferð:

1. Látið suðuna koma upp á kjúklingasoðinu og bætið kúskús út í.
2. Setjið lok á pottinn og takið af hellunni.
3. Látið standa í 5 mínútur.
4. Bætið chilimauki út í ásamt örlitlu af salti.
5. Mótið kúskúsið (t.d. í hring) og leggið þorskhnakkann ofan á.

Malt og appelsín síróp

1flaska maltöl

½ l appelsíon

1 tsk soyasósa

1 tsk. hrísgrjónaedik

Sjóðið maltið og appelsínið rólega niður í uþb. 1 dl og bætið þá soyasósu og ediki út í.

Papaja og kóríander salat

90 g papaya

½ búnt kóríanderlauf

Skerið papaya í fíngerða strimla (julienne).

Tínið laufin af kóríanderstilkunum.

Blandið saman og setjið með á diskinn.

______________________________________

Fylltur kjúklingur með gulrótum, spergli og fersku salati.

Snædís og Sandra

2 stk kjúklingabringur                8 g sólþurrkaðir tómatar

1 hvítlauksgeiri                          50 g grænar ólífur

2 stk skallottlaukar           salt og pipar

½ lítið box fetaostur                  (plastfilma og álpappír)

 Aðferð:

1.     Afhýðið hvítlauk og skalottlauka.

2.     Maukið sólþurrkaða tómata, hvítlauk, skalottlauka, fetaost og ólílfur saman í matvinnsluvél.

3.     Skerið í kjúklingabringurnar þannig að vasi myndist á hliðinni.

4.     Fyllið kjúklingabringurnar með maukinu og kryddið með salti og pipar.

5.     Pakkið kjúklingabringunum inn í plastfilmu og síðan í álpappír.

6.     Eldið í 200°C heitum ofni í 18 mínútur.

Salat:

100g klettasalat

60 g beikon steikt þar til stökkt og þerrað á pappír

Nokkrar grófar flögur parmesanostur

Gulrætur, spergill og sósa:

2 fallegar meðalstórar gulrætur

2 frekar stórir grænir sperglar/aspas

2 dl kjúklingasoð (2 dl kalt vatn og 1 ½ teningur kjúklingakraftur)

½ tsk. salt og ½ tsk nýmalaður svartur pipar

2 tsk. maple sýróp                                        ½ tsk. soyasósa

½ tsk. mjög smátt saxaði ferskt engifer          1 msk. smjör

          Aðferð:

1.     Hreinsið gulræturnar vel og skerið í tvennt eftir endilöngu.

2.     Skerið svo hvern helming í 2 hluta, þvert eftir miðju.

3.     Brjótið neðsta trénaða hlutann af sperglinum.

4.     Látið suðuna koma upp á kjúklingasoðinu í meðalstórum potti.

5.     Bætið salti, pipar, engifer, soya og sýrópi í og síðan gulrótunum.

6.     Látið gulræturnar sjóða í 3 mínútur.

7.     Bætið sperglinum í og sjóðið áfram í 3 mínútur.

8. Takið grænmetið upp úr, setjið á disk með álpappír yfir til að halda heitu.
9. Sigtið grænmetissoðið og hellið því aftur í pottinn.
10. Sjóðið niður þangað til það er u.þ.b ½ dl af sósu eftir í pottinum.
11. Takið af hitanum og bætið smjörinu í. Þeytið og notið sem sósu.

______________________________________

Tagliatelle kjúklingur með fersku salati og nýbökuðu brauði

 Baldur og Símon

Kjúklingurinn:

2 kjúklingabringur skornar í strimla

35 g engifer rifið niður

2 hvítlauksrif

Ólífuolía                                    Salt og pipar

½ stór kjúklingateningur leystur upp í 2 dl af heitu vatni

¼ matreiðslurjómi

Kjúklingabringurnar eru steiktar á pönnu í ólífuolíunni þangað til þær eru orðnar hvítar.

Marinn hvítlaukur og engifer sett yfir.

Kjúklingasoði og rjóma hellt yfir, saltað og piprað og soðið á pönnunni í 15 mínútur.

Pasta

½ pakki af Grand ítalian tagliatelle al uovo pasta

Sesam olía

Salt

Pastað sett í pott með léttsöltuðu sjóðandi vatni og soðið í 9 mínútur.

Sigtað, hellt í skál og sesam olíu hellt yfir.

Blandað saman við kjúklinginn í skál.

Naan brauð

4 dl hveiti

½ tsk. Matarolía

½ tsk. Salt

½ tsk matarsódi

1 ½ tsk. Þurrger

1 ½ dl vel volgt vatn

1 marið hvítlauksrif

Allt blandað saman í skál.

Hnoðað vel og látið lyfta sér í 20 mínútur á hlýjum stað.

Rúllið í lengju og skiptið í 4 bita.

Flatt út með höndum í u.þ.b. ½ cm. þykkar kökur

Pikkið í kökurnar með gaffli beggja megin.

Hitið þurra pönnu á meðalhita og bakið brauðin á báðum hliðum þangað til þau hafa lyft sér og eru orðin brúnflekkótt.

Penslið brauðin með örlitlu bræddu smjöri og dreifið ögn af hvítlaukssalti yfir.

Salat

Klettasalat

1. mak olía

2 dropar sítrónusafi

örlítið af grófrifnum parmesanosti

 Blandið olíu og sítrónusafa saman í skál, hristið salatið í skálinni, setjið á disk og dreifið parmesan yfir.

______________________________________