Kokkakeppni grunnskóla Íslands 2008

Kokkakeppni grunnskóla Íslands 2008 fór fram í Menntaskólanum í Kópavogi laugardaginn 12. apríl síðastliðinn.
Þetta ár tóku 16 skólar þátt í keppninni og sem dæmi um grósku í skólastarfi í Grafarvogi má benda á að af þessum skólum voru 7 skólar úr Grafarvoginum. Sá skóli sem kom lengst að kom alla leið frá Sauðarkróki og vonandi verða nemendur í Árskóla öðrum hvatning að ári og fleiri landsbyggðarskólar sjá sér þá fært að taka þátt.
Ásdís, Ástrós, Birta og Kristín Björk elduðu réttinn Íslandssól, nætursaltaðan þorskhnakka með síruskúskús og stóðu sig ákaflega vel en sigur úr bítum bar Hvaleyrarskóli.
Aðalsteinn Bjarni Sigurðsson, Ágústa Sólveig Sigurðardóttir og Björg Jósepsdóttir elduðu réttinn á brokki, hrossalund með humarhala og þótti dómurum handbrögðin með eindæmum "kokkakleg", uppsetning réttar frábær og bragðið eftir því. Þau munu því fara til London í sælkeraferð ásamt kennara sínum í lok maí í boði Hagkaupa, Innnes, Flugleiða og menntasviðs Reykjavíkur.
Í öðru sæti urðu nemendur í Hamraskóla, Arna Ýr Guðnadóttir, Heiðdís Ósk Pétursdóttir og Þórunn Sif Ingimundardóttir en þær elduðu réttinn "lostæti hreppstjórans", nautalund með parmaskinku og fengu að launum sælkeraveislu fyrir 2 á veitingastaðnum Silfrinu.
Þess má geta að nemendur úr Hamraskóla urðu í þriðja sæti í keppninni á síðasta ári.
Í þriðja sæti varð svo Engjaskóli en Karl Ágúst Hreggviðsson, Theodór P. Theodórsson, Valur Hreggviðsson og Ásgerður Júlía Ágústsdóttir elduðu grillaðan hlýra með tómatsultu og hvítlaukskremi.
Allir keppendur stóðu sig frábærlega og það er ljóst að matarmenning Íslendinga stefnir hátt miðað við þá rétti sem þetta áhugasama unga fólk galdraði fram í eldhúsi Menntaskólans í Kópacvogi.
Myndir og uppskriftir úr kokkakeppni grunnskóla Íslands 2008 ásamt öðru efni um kokkakeppni Rimaskóla má sjá á www.kokkakeppni.is (ÁT)

Sigurréttirnir