

Snemma beygist krókurinn. Á þessari mynd frá vorinu 1998 má sjá systurnar Arndísi Ýr og Júlíu Rós Hafþórsdætur ásamt Helga skólastjóra og Birni Bjarnasyni þáverandi menntamálaráðherra. Ráðherra afhenti Arndísi verðlaun fyrir tillögu í Nýsköpunarsamkeppni grunnskóla. Júlía Rós var skráð í sex ára bekk þetta vor og virðist stolt yfir afreki stóru systur. Þær systur eru báðar miklar afreksstúlkur. Arndís er Íslands- og Landsmótsmeistari í frjálsum íþróttum. Júlía Rós gefur systur sinni lítið eftir í frjálsum og er nú þegar orðin þekkt fyrir leikni sína í skáklistinni.


Haustið 2002 efndu Háskólinn og Barnasmiðjan í Grafarvogi til skemmtilegrar hönnunarsamkeppni meðal grunnskólanema. Keppnin fólst í því að útbúa bíl úr LEGÓ sem átti að flytja bolta eftir tilbúinni braut og skila honum í mark. Lið Rimaskóla stóð sig mjög vel í keppninni enda vel æfð af Sverri Guðmundssyni kennara og Þórhöllu liðsstjóra. Á neðri myndinni eru f.v. Regína 9-R, Heiðrún 9-R, Guðjón 9-S og Hlynur 9-S.

Ræðulið Rimaskóla stóðu sig einstaklega vel öll þau sex ár sem skólinn tók þátt í ræðukeppni grunnskóla. Í fjögur skipti keppti skólinn til úrslita og tvisvar sinnum vann Rimaskóli keppnina. Ræðukeppni grunnskóla fór síðast fram árið 2001 og þá vann Rimaskóli og hefur haldið titlinum og farandbikarnum síðan. Þau Agnar Darri, Sigurjón, Hólmfríður og Ásdís mynduðu sigursælt lið árið 2000. Þau kepptu til úrslita gegn Réttarholtsskóla í Ráðhúsi Reykjavíkur eftir að hafa áður lagt að velli Hólabrekkuskóla, Hagaskóla og Fellaskóla..

Fastur liður í starfi Rimaskóla hefur verið heimsókn elstu nemenda leikskólanna í skólann að vori. Þessi skemmtilega mynd var tekin í mars 1998 og sýnir væntanlega nemendur í 1. bekk koma sér vel fyrir á bókasafni skólans. Þau Þórey Rán, Sigrún Anna, Ívar Örn og Jóhann Óli eru núna öllum hnútum kunnug í skólanum enda komin í 7. bekk (f. 1992).




Skákhefðin í Rimaskóla á rætur sínar að rekja allt til þess er skólinn var stofnaður 1993. Frá fyrsta skólaári hefur verið keppt um titilinn Skákmeistari Rimaskóla. Nöfn sigurvegaranna er skráð á bikarinn á hverju ári. það hefur verið draumur hvers skákáhugamanns í Rimaskóla að vinna bikarinn góða og fá nafnið sitt skráð. Myndin var tekin við verðlaunaafhendingu að loknu skákmóti Rimaskóla 1997. Frá vinstri: Einar Jóhannes Finnbogason 8-R, skákmeistari Rimaskóla 1996, Bjarni Jóhannsson 9-T sem vann titilinn þetta árið og Hallvarður Guðni Svavarsson 9-S. Þeir urðu í þremur efstu sætunum í eldri flokki.

Þessi mynd úr safni Rimaskóla er af tvíburasystkinunum Kristínu Birnu og Ólafi Gauta Ólafssyni með fyrsta frjálsíþróttabikarinn sem skólinn vann vorið 1996. Þeim hefur nú aldeilis fjölgað síðan í bikaraskáp skólans. Barnasmiðjan við Gylfaflöt stóð fyrir hlaupakeppni á milli grunnskólanna í Grafarvogi í nokkur ár og vann Rimaskóli keppnina í öll skiptin. Undir liðsstjórn Ninnu kennara hafa nemendur Rimaskóla haldið merki skólans hátt á lofti í öllum hlaupakeppnum og nokkrir nú þegar orðið afreksmenn í einstaka greinum. Kristín Birna er í þessum hópi, er í landsliðshóp Íslands í frjálsíþróttum og ein skærasta hlaupadrottning landsins í dag.

"Nú styttist í jólaskemmtanir skólans og aðra viðburði skólastarfsins sem tengjast jólunum. Því er nú dregin fram mynd frá jólaskemmtun í Rimaskóla árið 1997. Þær Ásta Márusdóttir, Dagbjört Gunnarsdóttir og Helga Aradóttir voru í 7-A umsjónarbekk Katrínar Þorvaldsdóttur og lásu jólaguðspjallið á fyrstu aðventuhátíð Foreldrafélags Rimaskóla."

	Þeir Atli Steinn, Frank Ingi, Snorri og Guðjón voru nemendur Ninnu í 3-B haustið 1995. Ninna var umsjónarkennari B bekkjarins öll sjö ár barnaskólastigsins og hefur enginn kennari kennt sama bekknum svo lengi samfellt sem umsjónarkennari. Þeir Atli Steinn og Snorri útskrifuðust úr Rimaskóla vorið 2004 eftir tíu ára skólagöngu í Rimaskóla.