Katrín Myrra Þrastardóttir nemandi í 7-C Rimaskóla náði þeim glæsilega árangri nýlega að vinna Íslandsmeistaratitil í 2. þrepi fimleika. Hún hefur æft frá unga aldri og keppir fyrir hönd Fimleikafélagsins Ármanns. Þjálfarar Katrínar Myrru eru bæði innlendir og erlendir. Það má segja að hún hafi toppað á réttum tíma, þrotlausar æfingar skiluðu Katrínu Myrru þessum Íslandsmeistaratitli. Rimaskóli óskar Katrínu Myrru til hamingju með árangurinn og horfir með eftirvæntingu að eiga hana að í Skólahreystiliðinu okkar næstu árin (HÁ)

Nemendur Steinunnar í 3-B tóku sig vel út á sviðinu þegar þau héldu föstudagsfjörið sitt fyrir troðfullum sal áhorfenda.  Michael Jackson klæðnaður; hvítar skirtur, svartir hattar og hvítir hanskar. Fjörið byrjaði með glæsilegum dansi þar sem nemendur bekkjarins dönsuðu um allt svið og umhverfis áhorfendur á gólfinu. Allir sem einn með taktinn og sporin á hreinu. Síðan tóku við söngatriði þar sem söngkonurnar Anna og Erla sungu af krafti bæði á rússnesku og ensku. Barndarar og leikrit lentu á milli atriða. Mikið hlegið. Í lokin söng bekkurinn lag Eyfa "Ég lifi í draumi" og átti það vel við þetta unga og efnilega listafólk. (HÁ)

Níu nemendur í 7. bekk Rimaskóla tóku þátt í Stóru upplestrarkeppninni í ár. Keppt var í hátíðarsal Rimaskóla að viðstöddum nemendum árgangsins sem hvöttu bekkjarsystkini sín dyggilega. Keppnin var hnífjöfn og stóðu krakkarnir sig afskaplega vel við upplesturinn. Þriggja manna dómnefnd fékk það erfiða verkefni að úrskurða um hvaða keppendur kæmust áfram í lokakeppnina 22. mars í Grafarvogskirkju. Dómnefndin sem skipuð var Mörtu Karlsdóttur aðstoðarskólastjóra, Margréti Maríu Sigurðardóttur umboðsmanni barna og Pétri Þorsteinssyni presti úrskurðuðu þrjá jafna sigurvegara; Öldu Þyrí Þórarinsdóttur 7-A, Örnu Bjarnadóttur 7-A og Ernu Gunnarsdóttur 7-B. Sigurvegararnir hlutu að launum gjafabréf frá Bókabúðinni í Grafarvogi. (HÁ)

Undankeppnin í Skólahreysti stendur nú yfir. Lið Rimaskóla keppti í fjölmennasta riðlinum og stóð sig gríðarlega vel. Rimaskóli lenti í 2. sæti af 16 skólum með 77,5 stig aðeins fyrir neðan Ölduselsskóla. Rimaskóli á mikinn möguleika á að komast í  úrslitakeppnina 29. apríl í Laugardalshöll líkt og í fyrra. Í hinu öfluga liði Rimaskóla voru þau Margrét Unnur 9-U, Ratthaphon 10 - S, Sturla Snær 10 - S og Erla Dögg í 8-U. Keppnin var æsispennandi allan tímann og það var síðasta greinin sem féll með Rimaskóla og kom liðinu í 2. sætið. Stuðningsmannalið Rimaskóla var fjölmennt, íklætt fagurgulum bolum og með hvatningarskilti. Þjálfarar krakkannna eru kennararnir Ninna og Eyrún. www.skolahreysti.is (JÓ)