Starfmenn og nemendur Rimaskóla fóru svo sannarlega í hátíðarskapi og glaðir í sinni inn í páskafríið eftir að þremur velheppnuðum þemadögum var lokið með tilkomumikilli lokahátíð. Viðfangsefni nemenda á þemadögum var "Evrópa álfan mín" . Hver bekkur fékk eitt Evrópland til að vinna með. Á lokahátíðinni blasti árangur mikillar vinnu hvarvetna við þeim rúmalega eittþúsund gestum sem sóttu skólann heim af þessu tilefni. Í ávarpi Helga Árnasonar skólastjóra kom fram að einkunnarorð skólans "Regla , metnaður og sköpun " hefðu svo sannarlega staðið undir nafni þessa daga. Össur Skarphéðinsson utanríkisráðherra ávarpaði samkomuna og hældi nemendum fyrir áhugaverða vinnu auk þess sem hann hrósaði skólanum fyrir góða frammistöðu á ýmsum sviðum. Össur fullyrti að Rimaskóli væri einn mesti afreksskóli í skáklistinni í heimi.

Krakkarnir í Rimaskóla eru sko aldeilis að standa sig, ekki bara í skólanum. Hún Hekla Nína Hafliðadóttir hefur æft og stundað fimleika frá því hún man eftir sér. Fyrir stuttu keppti hún á fimleikameistaramóti Fjölnis og þar gekk henni allt í haginn. Hún varð fimleikameistari Fjölnis í 5. þrepi og hlaut að launum bikar og verðlaunapeninga. Sterkustu greinar Heklu Nínu eru sláin og stökkin. Rimaskóli óskar þessari efnilegu stúlku til hamingju með árangurinn. (HÁ)

Arna Bjarnadóttir 7-A í Rimaskóla vann úrslitakeppni Stóru upplestrarkeppninnar 2010 í Grafarvogi. Keppnin fór fram í Grafarvogskirkju að viðstöddu fjölmenni. Rimaskóli sendi tvo frábæra keppendur. Auk Örnu keppti Erna Gunnarsdóttir 7-B í upplestrarkeppninni og stóð sig líka með miklum sóma. Þær Arna og Erna unnu Rimaskólakeppnina í byrjun mars og hafa síðan undirbúið sig af kostgæfni undir leiðsögn Mörtu aðstoðarskólastjóra. Nemendur Rimaskóla hafa verið einstaklega sigursælir í þessari keppni og var þetta í sjötta skipti sem skólinn náði 1. sæti í Stóru upplestararkeppninni. (HÁ)