Nemendur þriggja grunnskóla í Grafarvogi héldu barnaþing í Rimaskóla. Barnaþingið hefur verið árlegur viðburður skólanna í Grafarvogi með nemendum 6. bekkkjar og tekist vel til undir stjórn kennara og Miðgarðs sem haldið hefur utan um framkvæmd þingsins. Að þessu sinni var væntanleg barnamenningarhátíð í Reykjavík,  dagana 19. - 25. apríl, viðfangsefni þingsins. Nemendur 6. bekkjar í Rimaskóla komu mjög vel undirbúin og kynntu frábærar tillögur að dagskrá barnamenningarhátíðar. Hugmyndir eins og gönguferð á Esjuna, kökukeppni þar sem verðlaunakökurnar yrðu sýndar í Kringlunni,dansatriði með nemendum í 1. - 3. bekk, listaverk við Smáraliind og kynnisferð um Egilshöll. Barnaþingið tókst mjög vel og var nemendum 6. bekkjar og kennurum þeirra til mikils sóma. (HÁ)

Nemendum í 2. og 3. bekk hefur gefist kostur á að æfa og þiggja skákkennslu í vetur. Björn Þorfinnsson alþjóðlegur meistari hefur kennt nemendahópi á miðvikudagsmorgnum og Sigríður Björg Helgadóttir hefur þjálfað stúlkurnar á þriðjudögum. Nú á miðri vorönn þótti ástæða til að halda skákmót í 2. og 3. bekk. Hver bekkjardeild valdi 2-3  þátttakendur og tefldar voru fimm umferðir. Þátttakendurnir brugðust ekki bekkjunum sínum því allir krakkarnir sextán sýndu mikinn áhuga og leikni og þeir bestu sýndu hreinlega snilldartakta miðað við aldur.

Katrín Myrra Þrastardóttir nemandi í 7-C Rimaskóla náði þeim glæsilega árangri nýlega að vinna Íslandsmeistaratitil í 2. þrepi fimleika. Hún hefur æft frá unga aldri og keppir fyrir hönd Fimleikafélagsins Ármanns. Þjálfarar Katrínar Myrru eru bæði innlendir og erlendir. Það má segja að hún hafi toppað á réttum tíma, þrotlausar æfingar skiluðu Katrínu Myrru þessum Íslandsmeistaratitli. Rimaskóli óskar Katrínu Myrru til hamingju með árangurinn og horfir með eftirvæntingu að eiga hana að í Skólahreystiliðinu okkar næstu árin (HÁ)

Nemendur Steinunnar í 3-B tóku sig vel út á sviðinu þegar þau héldu föstudagsfjörið sitt fyrir troðfullum sal áhorfenda.  Michael Jackson klæðnaður; hvítar skirtur, svartir hattar og hvítir hanskar. Fjörið byrjaði með glæsilegum dansi þar sem nemendur bekkjarins dönsuðu um allt svið og umhverfis áhorfendur á gólfinu. Allir sem einn með taktinn og sporin á hreinu. Síðan tóku við söngatriði þar sem söngkonurnar Anna og Erla sungu af krafti bæði á rússnesku og ensku. Barndarar og leikrit lentu á milli atriða. Mikið hlegið. Í lokin söng bekkurinn lag Eyfa "Ég lifi í draumi" og átti það vel við þetta unga og efnilega listafólk. (HÁ)