Íslandsmeistarasveit Rimaskóla í skák náði frábærum árangri á Norðurlandamóti  barnaskólasveita sem fram fór í Osló nú um helgina. Sveitin tefldi við bestu skáksveitir hinna Norðurlandanna og vann mótið nokkuð örugglega, tapaði engri viðureign og fékk 15,5 vinning af 20 mögulegum. Danska sveitin fylgdi Rimaskólasveitinni fast eftir á mótinu og endaði með 14 vinninga en aðrar sveitir voru þessum löndum langt að baki. Í sveit Rimaskóla eru gríðarlega efnilegir skákmenn á aldrinum 11 - 13 ára gamlir, ný kynslóð skákmeistara skólans; þeir Dagur Ragnarsson, Jón Trausti Harðarson, Kristinn Andri Kristinsson og bræðurnir Oliver Aron og Kristófer Jóel Jóhannessynir. Þjálfari þeirra er hinn 17 ára gamli Hjörvar Steinn Grétarsson, margfaldur Íslandsmeistari og Norðurlandameistari  með Rimaskóla og nýbakaður landsliðsmaður í skák. Fararstjóri liðsins líkt og á fyrri Norðurlandamótum var Helgi Árnason skólastjóri. Lið Rimaskóla vann Íslandsmeistaratitil barnaskólasveita annað árið í röð í mars sl. og hafa strákarnir í liðinu æft stíft meira og minna síðan. Skáksveitin fékk styrk frá Menntasviði Reykjavíkurborgar til þátttöku í mótinu og góða aðstoð frá Skákakademíu Reykjavíkur við æfingar. (HÁ)